Rolé Pranverore

Rolétë pranverore janë një ushqim kinez tradicional. Mbushen me një larmi produktesh si; mish, peshk, perime ose të përziera bashkë. Në supermarketet e furnizura mirë, do të gjeni fare lehtë petat e orizit, por mund dhe t’i bëni vetë duke zënë brumin me miell orizi, niseshté orizi, pak kripë dhe ujë.

Për 12 rolé:

1 pako me peta orizi, në mungesë të tyre, mund të përdorni dhe peta byreku

gjysmë lakre

1  karrotë

1 kungull

1 spec jeshil

1 spec i kuq

1 spec i verdhë

2 qepë të njoma

1 rrënjë e vogël xhinxher

200 gr. mish  viçi i grirë

3-4 lugë salcë soje

kripë

pak vaj luledielli

vaj kikiriku për skuqje
Për salcën:

1 spec djegës i freskët

2 lugë salcë domatesh

1 lugë e vogël niseshte

1 filxhan kafeje, sheqer ngjyrë kafe

1 filxhan kafeje, uthull e bardhë

2 filxhan kafeje ujë

pak kripë

Grijini perimet në fije të holla dhe vendosini të kavërdisen me pak vaj  në zjarr të mesëm, shtoni dhe mishin e grirë dhe kavërdisini së bashku. Shtoni kripë  dhe xhinxher të grirë me rende. Përziejini edhe për pak dhe shuajini me salcën e sojës. Hiqini dhe lërini të ftohen.

Njomini petat e orizit (nëse keni përdorur ato të gatshmet), në ujë të ngrohtë. Nëse përdorni peta byreku, nuk është e nevojshme. Hidhni pak mbushje në mes, përthyejeni fillimin, pastaj anët dhe mbështillini në formë roléje. Skuqini në vajin e nxehtë, derisa të bëhen “krokante”.

Përgatitni salcën, duke vendosur në zjarr uthullën me sheqerin, shtoni specin e grirë imët dhe salcën e domateve, pasi të trashet paksa, shtoni niseshtenë e përzier me ujin dhe përziejeni vazhdimisht derisa salca të trashet dhe në ajër nuk do të ndieni më aromën e uthullës.

Shërbejini rolétë së bashku me salcën.

Ju bëftë mirë 🙂

Shënim : për versioni e gatuara në avull ju duhet se sbën peta orizi dhe mjafton ti zieni në avull për 20 minuta.